स्काईवेल बीई११ नेपालमा सार्वजनिक, नाडा अटो शोमा ५९ लाख ९९ हजारदेखि विशेष मूल्य

काठमाडौं।लक्जरी चिनियाँ विद्युतीय सवारी ब्रान्ड ‘स्काईवेल’को बीई११ नेपालमा सार्वजनिक भएको छ । एलआरआर मोटर्सले मंगलबारदेखि काठमाडौंको भृकुटीमण्डपमा सुरु भएको नाडा अटो शो–२०२६ को अवसर पारेर बीई११ का विभिन्न भेरियन्ट नेपाली बजारमा सार्वजनिक गरेको हो।

कम्पनीका अनुसार बीई११ को नियमित मूल्य ४९ लाख ९९ हजारदेखि ६४ लाख ९९ हजार रुपैयाँसम्म तोकिएको छ । जसअनुसार ४१० किलोमिटर रेन्ज दिने इन्ट्री भेरियन्टको मूल्य ४९ लाख ९९ हजार, कम्फर्ट भेरियन्टको ५५ लाख ९९ हजार र लक्जरी भेरियन्टको ५६ लाख ९९ हजार रुपैयाँ रहेको छ । त्यस्तै, ५२० किलोमिटर रेन्ज दिने भेरियन्टको मूल्य ६४ लाख ९९ हजार रुपैयाँ तोकिएको छ ।

नाडा अटो शो अवधिभर ग्राहकका लागि विशेष मूल्यसमेत सार्वजनिक गरिएको छ । यसअन्तर्गत ४१० किलोमिटर रेन्ज दिने इन्ट्री भेरियन्ट ४६ लाख ९९ हजार, कम्फर्ट भेरियन्ट ५३ लाख ९९ हजार, लक्जरी भेरियन्ट ५४ लाख ९९ हजार र ५२० किलोमिटर रेन्ज दिने भेरियन्ट ५९ लाख ९९ हजार रुपैयाँमा उपलब्ध हुने कम्पनीले जनाएको छ ।

बीई११ मा ७१.९८ किलोवाट आवर क्षमताको एनएमसी ब्याट्री प्याक र ५१.९१ किलोवाट आवर क्षमताको एलएफपी ब्याट्री विकल्प उपलब्ध छन् । एनएमसी ब्याट्रीसहितको भेरियन्टले एकपटक पूर्ण चार्जमा ५२० किलोमिटर तथा एलएफपी ब्याट्रीसहितको भेरियन्टले ४१० किलोमिटर रेन्ज दिने कम्पनीको दाबी छ ।

१५० किलोवाट क्षमताको मोटर जडान गरिएको बीई११ मा ८०० भोल्टको हाई–भोल्टेज आर्किटेक्चर रहेको छ । डीसी फास्ट चार्जरमार्फत ब्याट्री ३५ मिनेटमै ७० प्रतिशतसम्म चार्ज गर्न सकिने कम्पनीले जनाएको छ ।

लक्जरी फिचरका रूपमा बीई११ मा पानारोमिक सनरुफ, ३६० डिग्री क्यामेरा, भेन्टिलेटेड सिट, फराकिलो इन्टेरियर र आधुनिक डिजाइन उपलब्ध छन् । गाडीमा १९८ मिलिमिटर ग्राउन्ड क्लियरेन्स रहेको छ, जसले नेपाली सडकका लागि उपयुक्त हुने कम्पनीको दाबी छ ।

एलआरआर मोटर्सले सोमबार स्काईवेलको लोगोसमेत सार्वजनिक गरेको थियो । नाडा अटो शोमा स्काईवेलको स्टल ‘एच१९’ मा रहेको छ ।