१३औँ कृति अवार्डस् २०८३ को घोषणा,३१ विधामा ५५ अवार्डका लागि प्रतिस्पर्धा
काठमाडौं।नेपालको विज्ञापन उद्योगको प्रतिष्ठित सम्मान ‘कृति अवार्डस् २०८३’ को १३औँ संस्करण आयोजना हुने भएको छ । नेपाल विज्ञापन संघ (आन)को आयोजनामा हुने अवार्डको यसपटकको मुख्य प्रायोजन रेडबुल इनर्जी ड्रिंक्सले गरेको छ । त्यससँगै अवार्डको नाम ‘रेडबुल १३औँ कृति अवार्डस् २०८३’ राखिएको छ ।
आगामी महिना आयोजना हुने अवार्ड समारोहमा विज्ञापन, मार्केटिङ तथा सञ्चार क्षेत्रमा उत्कृष्ट योगदान पुर्याउने एजेन्सी, सिर्जनाकर्ता र ब्राण्डलाई सम्मान गरिनेछ ।
आयोजनामा नेपाल मिडिया सोसाइटी, मिडिया एलायन्स नेपाल, ब्रोडकास्टिङ एसोसिएसन अफ नेपाल, एकोर्याब र ब्रोडकास्टर्स फोरम सहआयोजकका रूपमा सहभागी छन् । नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्स र नेपाल सरकारको विज्ञापन बोर्डले समेत इन्डोर्समेन्ट तथा सम्बन्धन प्रदान गरेका छन् ।
यस वर्ष टेलिभिजन, छापा, रेडियो, डिजिटल, प्रिन्ट, सामाजिक सञ्जाल र एकीकृत अभियानलगायत गरी ३१ विधामा ५५ वटा अवार्ड प्रदान गरिनेछ । आयोजकका अनुसार डिजिटल, इभेन्ट्स र इन्टिग्रेटेडसहित नयाँ क्षेत्र तथा विधाहरू थप गरिएको छ ।
अवार्डको मूल्यांकनलाई पारदर्शी र विश्वसनीय बनाउन काठमाडौं विश्वविद्यालय व्यवस्थापन संकायका डिन प्रा. डा. विजय केसीको अध्यक्षतामा जुरी गठन गरिएको छ । जुरीमा वरिष्ठ सञ्चारकर्मी भारती सिलवाल गिरी, वरिष्ठ मार्केटिङ विज्ञ रवीन्द्रमान श्रेष्ठसहित विभिन्न क्षेत्रका विशेषज्ञहरू रहेका छन् ।
आयोजकका अनुसार अवार्डका लागि मनोनयन दर्ता प्रक्रिया खुला भइसकेको छ । २०८० वैशाख १ गतेदेखि २०८३ असार मसान्तसम्म उत्पादन तथा प्रदर्शन भएका सिर्जनात्मक कार्यलाई प्रतियोगितामा दर्ता गराउन सकिनेछ ।
आनका अध्यक्ष सुदीप थापाले यस वर्ष थप विधा समेटेर विज्ञापन क्षेत्रको सिर्जनात्मकता र मौलिकतालाई प्रोत्साहन गर्न लागिएको बताए । उनका अनुसार कृति अवार्ड्सले नेपाली विज्ञापन बजारलाई अन्तर्राष्ट्रियस्तरमा चिनाउन तथा नेपाली अर्थतन्त्र र विज्ञापन बजारको विस्तारमा योगदान पुर्याउने अपेक्षा गरिएको छ
