पेन्सन पट्टा’को ट्रेलर सार्वजनिक, बाबुको पेन्सनपट्टामा भेटिएको रहस्यको खोजीमा दयाहाङ

काठमाडौं।माओत्से गुरुङको निर्देशन तथा दयाहाङ राईको मुख्य अभिनय रहेको फिल्म ‘पेन्सन पट्टा’को ट्रेलर सार्वजनिक भएको छ । भदौ २६ गतेदेखि प्रदर्शनमा आउने फिल्मको ट्रेलर सार्वजनिक भएसँगै यसको कथावस्तुलाई लिएर दर्शकको चासो बढेको छ ।

सिटी सेन्टरस्थित बिग मुभिजमा मंगलबार सार्वजनिक गरिएको ट्रेलरमा दिवंगत बाबुको पेन्सनपट्टामा आमाको नाम नभई बाबुकी पहिलो पत्नीको नाम भेटिएपछि उत्पन्न पारिवारिक रहस्यलाई प्रस्तुत गरिएको छ ।

ट्रेलरमा दयाहाङको पात्र जेठी आमाको खोजीमा निस्किएको देखिन्छ । यो खोजीका क्रममा परिवारभित्र लुकेका विगत, सम्बन्धको दूरी, पहिचान र पेन्सनको अधिकारसँग जोडिएका विषयहरू क्रमशः खुल्दै जाने संकेत गरिएको छ ।

लाहुरे जीवनलाई पेन्सन, प्रतिष्ठा र सुख–सुविधासँग मात्र जोडेर नहेरी त्यससँग जोडिएका पारिवारिक उतारचढाव तथा भावनात्मक पीडालाई फिल्मले कथाको केन्द्रमा राखेको देखिन्छ ।

फिल्मको ट्रेलर ओएसआर डिजिटलबाट सार्वजनिक गरिएको हो । ‘पेन्सन पट्टा’ले लाहुरे परम्पराले परिवार र समाजमा पारेको प्रभावलाई भावनात्मक कथामार्फत प्रस्तुत गर्ने अपेक्षा गरिएको छ ।