गायक तथा संगीतकार बाबुल गिरी पक्राउ, आत्महत्या दुरुत्साहन मुद्दामा अनुसन्धान अघि बढ्दो
काठमाडौं।गायक तथा संगीतकार बाबुल (धनबहादुर) गिरीलाई प्रहरीले पक्राउ गरेको छ। काठमाडौं जिल्ला प्रहरी परिसरका एसपी पवनकुमार भट्टराईका अनुसार उनलाई आत्महत्या दुरुत्साहन मुद्दामा नियन्त्रणमा लिइएको हो।
गिरीको स्टुडियोमा आगो लगाएर आत्मदाह प्रयास गरेकी नितु (पूरा नाम खुलाइएको छैन)को उपचारका क्रममा मृत्यु भएपछि प्रहरीले घटनाको अनुसन्धान अघि बढाएको हो। मृतक नितुको परिवारले स्टुडियो सञ्चालक गिरीविरुद्ध जाहेरी दर्ता गरेको प्रहरीले जनाएको छ।
गत शनिबार दिउँसो, नितुले काठमाडौंस्थित बाबुल गिरीको स्टुडियोमा आफैंमाथि पेट्रोल छ्यापी आगो लगाएकी थिइन्। उनलाई तत्कालै उद्धार गरी कीर्तिपुरस्थित बर्न अस्पताल लगिएको थियो। तर उपचारकै क्रममा उनको मृत्यु भएको प्रहरीले जनाएको छ।
प्रहरीका अनुसार हाल बाबुल गिरीमाथि विस्तृत अनुसन्धान जारी रहेको छ। प्रारम्भिक अनुसन्धानमा मानसिक तनाव र व्यक्तिगत विवादका कारण घटना भएको हुनसक्ने आशंका गरिएको छ।
यस घटनाले संगीत क्षेत्रमा भइरहेका व्यक्तिगत सम्बन्ध र कार्य वातावरणबारे पनि पुनः प्रश्न उठाएको छ।
