पहिलो दिन ‘सिनेमामा पर्यटन’ महोत्सव र ‘सिनेमासंवाद’ कार्यक्रमले चर्चा बटुल्यो
इलाम,श्रीअन्तु–चलचित्र पत्रकार संघको २६औं वार्षिक उत्सव तथा तीनदिने राष्ट्रिय भेला इलामको सुन्दर पर्यटकीय स्थल श्रीअन्तुमा भव्य रूपमा सुरु भएको छ। उद्घाटन दिन ‘सिनेमामा पर्यटन’ महोत्सव र ‘सिनेमासंवाद’ कार्यक्रम सम्पन्न भए।
कार्यक्रमको मुख्य आकर्षण ‘सिनेमासंवाद’ थियो, जसमा पत्रकार विष्णु सुवेदी सहजकर्ता थिए। छलफलमा चलचित्रमार्फत पर्यटन प्रवर्द्धनका सम्भावना, चुनौतीहरू, र सञ्चारकर्मी तथा चलचित्रकर्मीबीचको सम्बन्धबारे विविध दृष्टिकोण राखिए।
छलफलमा चलचित्र विकास बोर्डका अध्यक्ष दिनेश डिसी, वरिष्ठ अभिनेत्री वसुन्धरा भुसाल, अभिनेत्री गौरी मल्ल, कलाकार संघका अध्यक्ष मोहन निरौला, निर्देशक समाजका अध्यक्ष जनकदीप पराजुली, र संघका पूर्व अध्यक्ष शान्तिप्रियको विशेष उपस्थिति रहेको थियो।
कार्यक्रममा वसुन्धरा भुसाल र शान्तिप्रियले चलचित्रको गुणस्तर, पत्रकारिताको प्रभाव, र नकारात्मक पक्षले पारेको असरबारे गम्भीर प्रश्न उठाए। दिनेश डिसीले चलचित्र ऐन, नियम, र पत्रकार–चलचित्रकर्मीबीचको सहकार्य कसरी मजबुत बनाउने भन्नेबारे प्रस्तुति राखे।
कार्यक्रममा पत्रकार ध्रुव लम्साल, विष्णु सुवेदी, नरेन्द्र बस्नेत (कोशी), जीवनकुमार पराजुली, वर्षा बस्नेत, रश्मी थापा, र तुलसीप्रसाद निरौला (कोशी) लाई विभिन्न विधामा नगद पुरस्कारसहित सम्मान गरिने घोषणा गरिएको छ।
संघका महासचिव रघुनाथ सापकोटाका अनुसार आगामी दिनहरूमा कार्यशाला, मिडिया मन्थन, सिनेमासंवाद, अन्तरक्रिया तथा ‘सिनेमा पर्यटन’ महोत्सवका अन्य कार्यक्रमहरू सञ्चालन गरिने छन्।
कार्यक्रममा निर्माता पुनम क्षेत्री, निर्देशक तथा कोरियोग्राफर रेनासा वान्तावा राई, निर्माता प्रज्वल राणा, निर्देशक मिलन चाम्स, चलचित्र संघका अध्यक्ष नरेन्द्र महर्जन, र निर्माता प्रेमकुमार श्रेष्ठ पनि सहभागी हुने छन्।
