न्यूयोर्क।परराष्ट्रमन्त्री शिशिर खनालले संयुक्त राष्ट्रसंघको ८१औँ महासभाका अवसरमा बुधबार न्यूयोर्कमा भारतीय विदेशमन्त्री डा. एस. जयशंकरसँग भेटवार्ता गरेका छन्।
भेटका क्रममा मन्त्री खनालले नेपालमा हालै आएको विनाशकारी बाढीपछि भारत सरकार तथा भारतीय जनताले व्यक्त गरेको ऐक्यबद्धता र उपलब्ध गराएको तत्कालीन सहयोगप्रति धन्यवाद व्यक्त गरेका थिए।
भेटमा नेपाल–भारत सम्बन्धका विविध पक्षसँगै आपसी हित र चासोका विषयमा समेत विचार आदानप्रदान भएको परराष्ट्रमन्त्री खनालको सचिवालयले जनाएको छ।
दुवै पक्षबीचको भेटले नेपाल र भारतबीचको द्विपक्षीय सम्बन्ध तथा सहकार्यका विषयमा थप संवादको आधार तयार गरेको जनाइएको छ।
