हङकङमा नेपाली सीपको विस्तार गर्दै आकाश बन्जारा, योग र साउण्ड हिलिङमा नयाँ सम्भावना
हङकङ।व्यस्त र तनावपूर्ण जीवनशैलीका कारण योग, ध्यान तथा साउण्ड हिलिङप्रति हङकङमा चासो बढ्दै गएको छ। यही बढ्दो मागलाई लक्षित गर्दै नेपाली नेतृत्वमा सञ्चालित विभिन्न संस्थाहरूले स्थानीय समुदाय, शैक्षिक संस्था तथा सामाजिक निकायमा योग र साउण्ड हिलिङका कार्यक्रम सञ्चालन गर्दै आएका छन्।
हिमालयज वेलनेस हङकङका संस्थापक आकाश बन्जाराको नेतृत्वमा सञ्चालित साउण्ड हिलिङ एचके र सिङ्गिङ बाउल एचकेले हङकङका विभिन्न स्थानीय संघ–संस्था तथा समुदायमा यस्ता सेवा प्रदान गर्दै आएको जनाएको छ। संस्थाका अनुसार स्काउट, प्रहरी प्रशासन, रेडक्रस, अस्पताल, विद्यालय, कलेज तथा वृद्धाश्रमलगायतका स्थानमा साउण्ड हिलिङ, योग र ध्यानका सत्रहरू सञ्चालन भइरहेका छन्।
बन्जाराका अनुसार उनको नेतृत्वमा रहेका संस्थाहरूले हङकङसँगै नेपाल, ताइवान र भियतनाममा समेत योग तथा साउण्ड हिलिङसम्बन्धी सेवा र तालिमका कार्यक्रम सञ्चालन गर्दै आएका छन्।
नेपालमा प्राकृतिक ध्वनि उपचारसम्बन्धी तालिम सञ्चालनका लागि नेचुरल साउण्ड हिलिङ इन्टरनेशनल स्कुल स्थापना गरिएको र नेपाल सरकारसँग सहकार्य गर्दै आएको उनको दाबी छ। हङकङमा समेत नेपाली महावाणिज्य दूतावाससँग समन्वय गरी नेपाली समुदायमाझ सेवा पुर्याइएको उनले बताएका छन्।
हङकङमा योग, ध्यान तथा साउण्ड हिलिङसम्बन्धी सेवाको माग बढ्दै जाँदा नेपाली युवाका लागि नयाँ सीप तथा रोजगारीको सम्भावना सिर्जना हुन सक्ने बन्जाराको भनाइ छ।
उनका अनुसार विद्यालय, कलेज, वृद्धाश्रम तथा विभिन्न सामाजिक संस्थाहरूमा यस्ता कार्यक्रमको माग बढिरहेको छ। नेपाली युवालाई आवश्यक तालिम प्रदान गरी दक्ष योग प्रशिक्षक तथा साउण्ड हिलिङ व्यवसायी तयार गर्न सके स्थानीय बजारमा रोजगारी तथा स्वरोजगारका अवसर विस्तार गर्न सकिने उनको भनाइ छ।
हङकङमा रहेका नेपाली सामाजिक संघ–संस्थाहरूले पनि यस क्षेत्रमा समन्वय र सहकार्य गर्न सके नेपाली समुदायभित्रै सीप विकास तथा रोजगारी सिर्जना गर्न सकिने उनको धारणा छ।
योग र साउण्ड हिलिङलाई स्वास्थ्य तथा मानसिक शान्तिसँग जोडेर हेर्ने क्रम बढिरहेका बेला यस क्षेत्रले व्यावसायिक सम्भावना पनि विस्तार गर्दै गएको बताइएको छ।
प्रशिक्षण, व्यक्तिगत तथा सामूहिक सत्र, विद्यालय तथा संस्थागत कार्यक्रममार्फत नेपाली युवाले यसलाई स्वरोजगारको माध्यम बनाउन सक्ने बन्जारा बताउँछन्। उनका अनुसार दक्ष जनशक्ति उत्पादनसँगै अन्तर्राष्ट्रिय बजारमा नेपाली मौलिक ज्ञान र सीपलाई प्रवर्द्धन गर्न सकिने सम्भावना पनि छ।
यद्यपि योग तथा साउण्ड हिलिङसम्बन्धी स्वास्थ्यसम्बन्धी दाबी गर्दा वैज्ञानिक प्रमाण, तालिमको स्तर र स्थानीय कानुनी मापदण्डलाई समेत ध्यान दिनुपर्ने आवश्यकता छ। हङकङमा यस क्षेत्रको विस्तारसँगै व्यवस्थित तालिम र व्यावसायिक मापदण्ड कायम गर्न सके नेपाली युवाका लागि नयाँ अवसरको क्षेत्र बन्न सक्ने देखिन्छ।
