रसुवा बाढीपीडितका लागि नेपाल तामाङ घेदुङलाई ७ लाख रुपैयाँ सहयोग
काठमाडौं-२०८३ साल भदौ १० गते रसुवामा आएको विनाशकारी बाढीबाट प्रभावित परिवारहरूको राहत तथा पुनर्स्थापनाका लागि एसियाका आदिवासी जनजातिको ऐक्यबद्धता कोष (IPAS) को तर्फबाट ७ लाख रुपैयाँ सहयोग प्रदान गरिएको छ।
IPAS की एसियाली प्रतिनिधि तथा निडवानकी संस्थापक प्रतिमा गुरुङले नेपाल तामाङ घेदुङसँग सहकार्य गर्ने प्रतिबद्धता जनाउँदै ७ लाख रुपैयाँको चेक हस्तान्तरण गर्नुभएको हो।
२०८३ साल भदौ १० गते आएको विनाशकारी बाढीले रसुवाका विभिन्न बस्तीमा ठूलो जनधनको क्षति पुर्याएको थियो। कतिपय परिवारले घरबार गुमाएका छन् भने कतिले आफ्ना प्रियजनसमेत गुमाएका छन्। खेतीपाती, पशुपालन, व्यापार–व्यवसाय तथा दैनिक जीविकोपार्जनका आधारहरूमा समेत बाढीले गम्भीर क्षति पुर्याएको छ।
यस्तो कठिन परिस्थितिमा पीडित परिवारहरूलाई तत्काल राहतसँगै दीर्घकालीन पुनर्स्थापनाको आवश्यकता रहेको भन्दै सहयोग रकम हस्तान्तरण गरिएको हो। बाढीपीडितको पीडा केवल सहानुभूतिका शब्दले कम हुँदैन संकटमा साथ दिने हात र व्यवहारमा देखिने सहयोग आवश्यक हुन्छ भन्ने सन्देश यस सहयोगले दिएको छ।
नेपाल तामाङ घेदुङका संघीय अध्यक्ष रामकृष्ण ब्लोन तामाङले प्राप्त सहयोग रकमलाई बाढीबाट प्रत्यक्ष रूपमा प्रभावित वास्तविक पीडितसम्म पारदर्शी र प्रभावकारी ढंगले पुर्याउने प्रतिबद्धता व्यक्त गर्नुभएको छ। उहाँले विपत्तिको समयमा विभिन्न व्यक्ति, संस्था तथा सहयोगी हातहरूले देखाएको ऐक्यबद्धताप्रति आभार व्यक्त गर्दै पीडितको आवश्यकता र प्राथमिकतालाई केन्द्रमा राखेर राहत वितरण गरिने बताउनुभयो।
रसुवाको बाढीले केवल भौतिक संरचना र सम्पत्ति मात्र बगाएको छैन। धेरै परिवारको भविष्य, जीवनयापनको आधार र सुरक्षित भोलिप्रतिको भरोसासमेत संकटमा परेको छ। त्यसैले यस्ता सहयोगले तत्काल राहत मात्र नभई पीडितलाई आफूहरू एक्ला छैनन् भन्ने मनोवैज्ञानिक भरोसा पनि प्रदान गर्ने अपेक्षा गरिएको छ।
विपत्तिको समयमा सहयोगको मूल्य रकमको आकारले मात्र मापन हुँदैन। संकटमा परेको समुदायप्रति देखाइएको जिम्मेवारी, मानवीय संवेदना र साथको भावना पनि उत्तिकै महत्वपूर्ण हुन्छ। ७ लाख रुपैयाँको यो सहयोग रसुवाका बाढीपीडितका लागि केवल आर्थिक सहायता मात्र होइन, दुःखको घडीमा साथ र सहकार्यका लागि समाज तथा संस्थाहरू तयार छन् भन्ने सन्देश पनि हो।
विपत्तिले धेरैको घर बगायो, धेरैको सम्पत्ति बगायो र कतिपयको परिवार नै उजाड बनायो। तर संकटको यही घडीमा सहयोगका लागि अगाडि बढेका हातहरूले मानवता अझै जीवित छ भन्ने प्रमाण दिएका छन्।
रसुवा बाढीपीडितका लागि प्रदान गरिएको ७ लाख रुपैयाँको सहयोग यही भरोसा, एकता र मानवीय सहकार्यको सशक्त सन्देश बनेको छ।
