लामो स्थगनपछि आज बस्दै प्रतिनिधिसभा,अर्थसम्बन्धी विधेयक समितिमा पठाइने

काठमाडौं।लामो समयपछि संघीय संसद्अन्तर्गत प्रतिनिधिसभाको बैठक आज बिहान ११ बजे बस्ने भएको छ। बजेट पारित भएयता स्थगित हुँदै आएको बैठकमा आज अर्थसम्बन्धी महत्त्वपूर्ण विधेयकमाथि प्रक्रिया अघि बढाइने कार्यसूची रहेको छ।

संघीय संसद् सचिवालयका अनुसार अर्थमन्त्री डा. स्वर्णिम वाग्लेले अर्थसम्बन्धी केही नेपाल ऐन संशोधन तथा खारेज गर्ने विधेयकलाई दफावार छलफलका लागि सम्बन्धित समितिमा पठाउने प्रस्ताव प्रस्तुत गर्नेछन्। उक्त विधेयक आर्थिक सुधारसँग सम्बन्धित कानुनी व्यवस्था अद्यावधिक गर्ने उद्देश्यले अघि बढाइएको हो। 

बैठकमा प्रतिनिधिसभाका पूर्वसदस्य तथा संविधानसभा सदस्य गोपालमान श्रेष्ठको निधनप्रति सभामुखबाट शोक प्रस्ताव पनि प्रस्तुत गरिने कार्यसूची छ। 

लामो स्थगनपछि प्रतिनिधिसभाको नियमित बैठक सुरु हुन लागेकाले आर्थिक विधेयक, नीति तथा अन्य संसदीय कार्यलाई पुनः गति दिने अपेक्षा गरिएको छ। संसद्को प्रभावकारी सञ्चालन र समयमै विधेयक टुंग्याउनु वर्तमान सन्दर्भमा सरकार र संसद् दुवैका लागि महत्त्वपूर्ण मानिएको छ।