गरिमा विकास बैंकको १९औं वार्षिक साधारणसभा सम्पन्न,कुल १०.५३ प्रतिशत लाभांश पारित
पोखरा।गरिमा विकास बैंक लिमिटेडको उन्नाइसौं वार्षिक साधारणसभा मिति २०८२ कार्तिक २७ गते (विहिबार) पोखरा महानगरपालिका-२५, कास्कीस्थित होटल पोखरा ग्राण्डमा सम्पन्न भएको छ। सभाले आर्थिक वर्ष २०८१/८२ का लागि शेयरधनीहरुलाई हाल कायम चुक्ता पूँजीको ६ प्रतिशत बोनस शेयर र ४.५३ प्रतिशत नगद लाभांश (कर सहित) गरी कुल १०.५३ प्रतिशत लाभांश वितरण गर्ने प्रस्ताव सर्वसम्मत रूपमा पारित गरेको छ।
सभामा आर्थिक वर्ष २०८१/८२ को वार्षिक प्रतिवेदन, लेखापरीक्षकको प्रतिवेदन सहितको नाफा–नोक्सान हिसाब, नगद प्रवाह विवरण,नाफा–नोक्सान बाँड फाँड हिसाब,इक्विटीमा भएको परिवर्तन लगायतका विवरणहरू पारित गरिएको छ।साथै,आगामी आर्थिक वर्ष २०८२/८३का लागि लेखापरीक्षक नियुक्त गर्ने प्रस्ताव पनि स्वीकृत गरिएको छ।
विशेष प्रस्ताव अन्तर्गत सभाले विकास बैंकको अधिकृत पूँजी बढाई रु. ६ अर्ब १० करोड पुर्याउने निर्णय गरेको छ।साथै,बैंकको केन्द्रीय कार्यालय काठमाडौं महानगरपालिका–२,लाजिम्पाट बाट स्थानान्तरण गरी बालुवाटारस्थित आफ्नै भवनमा सार्ने,बैंकको छाप र लोगो परिवर्तन गर्ने, साथै प्रबन्धपत्र र नियमावली संशोधन गर्ने निर्णयहरू पनि पारित गरिएको छ।
हाल विकास बैंकको चुक्ता पूँजी रु. ५ अर्ब ६८ करोड ५ लाख १७ हजार ३२७.५७ रहेकोमा ६ प्रतिशत बोनस शेयर वितरण पश्चात रु. ६ अर्ब २ करोड १३ लाख ४८ हजार ३६७.२२ पुग्ने बैंकले जनाएको छ।
गरिमा विकास बैंकले देशभर १२६ शाखा कार्यालय र ५१ एटिएम मार्फत सेवा प्रवाह गर्दै आएको छ। बैंकले नवीनतम डिजिटल बैंकिङ प्रणालीमार्फत ग्राहकलाई सरल, सुरक्षित र गुणस्तरीय सेवा प्रदान गर्दै आएको जनाएको छ।
