उर्लाबारीमा सम्पन्न अनलाइन टिभी पत्रकार संघ, कोशी प्रदेशको प्रथम ऐतिहासिक अधिवेशन

काठमाडौ-अनलाइन भिडियो पत्रकारितामा क्रियाशील पत्रकारहरूको साझा संस्था अनलाइन टिभी पत्रकार संघ, नेपाल को कोशी प्रदेशस्तरीय प्रथम अधिवेशन मोरङको उर्लाबारीमा ऐतिहासिक रूपले सम्पन्न भएको छ। अधिवेशनले उर्लाबारीका किशोर कुमार श्रेष्ठको अध्यक्षतामा ९ सदस्यीय प्रदेश समिति सर्वसम्मत रूपमा चयन गरेको छ।

प्रदेश कार्यसमितिमा झापाका खगेन्द्र घिमिरे उपाध्यक्ष, मोरङका सरोज बस्नेत सचिव, सुनसरीका विनोद राना मगर सहसचिव, र मोरङकै सम्झना राई कोषाध्यक्षमा चयन भएका छन्।

त्यस्तै, प्रदेश समितिका सदस्यहरूमा किशोर निरौला, विजय भट्टराई, अफ्ताब अली र निशान ढकाल रहेका छन्।

२०७६ सालमा काठमाडौंमा स्थापना भएको अनलाइन टिभी पत्रकार संघले डिजिटल माध्यममार्फत पत्रकारितामा संलग्न पत्रकारहरूको अधिकार, हैसियत र दक्षता अभिवृद्धिका लागि कार्य गर्दै आएको छ। संघका वरिष्ठ उपाध्यक्ष सञ्जीव रेग्मीका अनुसार हालसम्म दुई प्रदेशमा अधिवेशन सम्पन्न भइसकेको छ भने बाँकी प्रदेशहरूमा पनि निकट भविष्यमा अधिवेशन गर्ने तयारी भइरहेको छ।

उनका अनुसार संघले हालसम्म १५ जिल्लामा जिल्ला शाखा विस्तार गरिसकेको छ र चाँडै केन्द्रीय अधिवेशन आयोजना गर्दै संगठन विस्तारलाई तीव्रता दिने योजना बनाइएको छ।

इन्टरनेट पत्रकारिता क्षेत्रलाई मर्यादित र उत्तरदायी बनाउने उद्देश्यले संघले नेपालमै पहिलोपटक ‘अनलाइन टिभी स्वनियमन निर्देशिका’ जारी गरी कार्यान्वयनमा ल्याइसकेको छ। साथै, संघले आफ्ना सदस्यहरूलाई नियमित तालिममार्फत दक्ष बनाउन समेत निरन्तर कार्यक्रम सञ्चालन गर्दै आएको छ।