जिल्ला अस्पताल खोटाङ ५० शैयामा स्तरोन्नति: रास्वपाको विरोध

खोटाङ—जिल्ला अस्पताल खोटाङ १५ शैयाबाट ५० शैयामा स्तरोन्नति भएको अवसरमा आयोजना गरिएको उद्घाटन कार्यक्रमप्रति राष्ट्रिय स्वतन्त्र पार्टी (रास्वपा) खोटाङले विरोध जनाएको छ।

कोशी प्रदेशका भौतिक पूर्वाधार तथा स्वास्थ्य मन्त्री भूपेन्द्र राईको उपस्थितिमा सो उद्घाटन कार्यक्रम आयोजना गर्न लागिएको हो। रास्वपा खोटाङले एक विज्ञप्ति जारी गर्दै यो उद्घाटन कार्यक्रम अनावश्यक भएको भन्दै आलोचना गरेको छ। पार्टीका अनुसार अस्पतालको संरचना वा सेवामा ठोस सुधार नगरी केवल कागजी निर्णयको उद्घाटन गर्नु जनतासँग धोका हुनेछ।

रास्वपाले विज्ञप्तिमा स्वास्थ्य सेवा गुणस्तरमा सुधार र आवश्यक जनशक्ति तथा उपकरण व्यवस्थापनमा ध्यान दिन सरकारसँग माग गरेको छ। साथै, अस्पतालमा हालका दिनमा जनशक्ति अभाव, उपकरणको कमी र सेवाग्राहीको असन्तुष्टि सम्बोधन गर्न आग्रह गरेको छ।

यसबीच, जिल्ला अस्पताल प्रशासनले भने ५० शैयाको स्तरोन्नतिको घोषणा स्वास्थ्य सेवा विस्तार र पूर्वाधार विकासतर्फको सकारात्मक कदम भएको प्रतिक्रिया दिएको छ।