पाथीभरा केवलकार निर्माणको बिरोध गर्ने समुहमाथि प्रहरीको गोली प्रहार दुई जना घाइते

काठमाडौं। पाथीभरा केवलकार निर्माणको बिषयमा बिरोध गर्दैआएका समुहमाथि प्रहरीले गोली प्रहार गरेको छ । गोली प्रहारबाट बिरोध गर्ने स्थानीय दुई जना घाइते भएका छन् ।

यो केवलकार ताप्लेजुङको फुङलिङ नगरपालिका– ११ पाथीभरामा निर्माण भइरहेको छ । निर्माणको विरोधमा ओर्लेका समुहमाथि प्रहरीले शनिबार वेलुका ६ बजे गोली प्रहार गरेका थिए । प्रहरीको गोली लागेर यमबहादुर लिम्बू र धर्मान पालुङ्वा घाइते भएका हुन् । दुवै घाइतेको ताप्लेजुङस्थित जिल्ला अस्पतालमा उपचार भइरहेको छ ।

ताप्लेजुङका प्रमुख जिल्ला अधिकारी नेत्रप्रसाद शर्माले गोली लागेका एकजनालाई केही अघि र अर्का एकको भर्खरै अस्पताल ल्याइएको जानकारी दिए । उनका अनुसार पाथीभरा क्षेत्रको बलुडाडा आसपास सुरक्षाकर्मी र केबलकार विरोधी पक्षबीच झडप हुँदा प्रहरीले गोली चलाएको हो ।

‘शर्माका अनुसार प्रहरीमाथि गुलेली र ढुंगा प्रहार भएपछि सुरक्षाकर्मीबाट फायरिङ भएको थियो । निर्माणस्थलमा शनिबार दिनभर जसो झडप भएको थियो । झडपको क्रममा पहिचान पक्षधर सुमन लावती घाइते भएका थिए ।