भृकुटीमण्डपमा नाइमा मोबिलिटी एक्स्पो सुरु, ५५ भन्दा बढी ब्रान्ड सहभागी
काठमाडौं।नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएसन (नाइमा) को आयोजनामा ‘NAIMA Nepal Mobility Expo 2026’ आजदेखि काठमाडौंको भृकुटीमण्डपमा सुरु भएको छ । नेपालको सबैभन्दा ठूलो मोबिलिटी प्रदर्शनीका रूपमा आयोजना गरिएको एक्स्पो साउन ३१ गतेसम्म सञ्चालन हुनेछ ।
एक्स्पोमा दुईपांग्रे र चारपांग्रे सवारीसाधनसहित ५५ भन्दा बढी राष्ट्रिय तथा अन्तर्राष्ट्रिय अटोमोबाइल तथा मोबिलिटी ब्रान्डको सहभागिता रहेको छ । प्रदर्शनीमा ५३ वटा स्टलमार्फत विभिन्न सवारीसाधन, प्रविधि तथा मोबिलिटीसम्बन्धी उत्पादन र सेवाहरू प्रस्तुत गरिएको छ।
एक्स्पोमा दुईपांग्रे सवारीका १८ तथा चारपांग्रे सवारीका २९ नयाँ ब्रान्ड सार्वजनिक तथा प्रदर्शनीमा राखिने आयोजकले जनाएको छ । विद्युतीय सवारी, नयाँ प्रविधि र दिगो मोबिलिटीका क्षेत्रमा भएका पछिल्ला विकासलाई उपभोक्तासमक्ष पुर्याउने उद्देश्यले एक्स्पो आयोजना गरिएको हो ।
एक्स्पो अवधिभर सवारी तथा सडक सुरक्षासँगै विद्युतीय सवारीमा प्रयोग भएका ब्याट्रीको व्यवस्थापन, नयाँ प्रविधि, नीति तथा मोबिलिटी क्षेत्रका चुनौतीबारे Learning Sessions, Policy Dialogues and Industry Interactions आयोजना गरिनेछ । कार्यक्रममा स्वदेशी तथा विदेशी विज्ञ, उद्योगी, विद्यार्थी र विभिन्न सरोकारवाला सहभागी हुनेछन् ।
नाइमाकी अध्यक्ष रितु सिंह वैद्यले एक्स्पोले नेपालको मोबिलिटी क्षेत्रको वर्तमान अवस्था प्रस्तुत गर्नुका साथै भविष्यको दिशा तय गर्न महत्वपूर्ण भूमिका खेल्ने बताइन् । उनका अनुसार एक्स्पोमा प्रविधि, नवप्रवर्तन र दिगो मोबिलिटीका नवीनतम विकासलाई प्राथमिकता दिइएको छ ।
अटो सो प्लानिङ कमिटीका अध्यक्ष गौरव सारडाले प्रदर्शनीसँगै तालिम, ज्ञान आदानप्रदान तथा जनचेतनामूलक कार्यक्रमलाई पनि विशेष प्राथमिकता दिइएको बताए ।
एक्स्पो उद्घाटनको दिन आज दिउँसो १ बजेदेखि साँझ ७ बजेसम्म सञ्चालन हुनेछ भने बाँकी दिनमा बिहान ११ बजेदेखि साँझ ७ बजेसम्म सर्वसाधारणका लागि खुला रहनेछ । एक्स्पोको सह–प्रायोजकमा ग्लोबल आइएमई बैंक तथा विभिन्न क्षेत्रका बैंकिङ, बीमा, प्रविधि, चार्जिङ, राइड, मेडिकल, सुरक्षा र मिडिया साझेदार रहेका छन् ।
