जनताको आवाज कहिले सुनिन्छ? त्रिभुवन विमानस्थलदेखि नेपाल एयरलाइन्ससम्म उठेका प्रश्न
काठमाडौं।सामाजिक सञ्जालमा जापानबाट आएका उमेश खड्काले सार्वजनिक गरेको एउटा फेसबुक स्टाटसले फेरि एकपटक नेपालको हवाई सेवा र त्रिभुवन अन्तर्राष्ट्रिय विमानस्थलको सेवा व्यवस्थापनमाथि गम्भीर प्रश्न उठाएको छ।
जापानबाट आएका आफ्ना एक जापानी नागरिक साथीसँग नेपाल आउँदा त्रिभुवन अन्तर्राष्ट्रिय विमानस्थलमा करिब सात घण्टा बिताउनुपरेको अनुभव उनले साझा गरेका छन्।उनको भनाइअनुसार त्यो समय केवल ढिलाइको अनुभव मात्र थिएन, यात्रुहरूले दैनिक रूपमा भोग्ने अव्यवस्था, गुनासो र निराशाको प्रत्यक्ष दृश्य थियो।
उनले लेखेका छन यदि आफूसँग एउटा क्यामेरा मात्र भएको भए नेपाल एयरलाइन्सको व्यवस्थापनबारे एउटा शक्तिशाली खोजमूलक सामग्री तयार गर्न सकिने अवस्था थियो।उनले सम्बन्धित अधिकारीहरूलाई वीआईपी कक्षभन्दा बाहिर निस्केर सामान्य यात्रुको लाइनमा उभिन, प्रतिवेदनभन्दा जनताको आवाज सुन्न र कागजमा नदेखिएका वास्तविक समस्या बुझ्न आग्रह गरेका छन्।
स्टाटसमा उल्लेख गरिएको अर्को प्रसंग अझै गम्भीर छ।उनीसँग आएका एक जापानी यात्रुले भविष्यमा नेपाल एयरलाइन्स प्रयोग नगर्ने निर्णय सुनाएको दाबी गरिएको छ।यो अभिव्यक्तिलाई केवल एउटा यात्रुको असन्तुष्टि भनेर बेवास्ता गर्न सकिँदैन।नेपालको पर्यटन, राष्ट्रिय ध्वजावाहक वायुसेवा र अन्तर्राष्ट्रिय छविसँग जोडिएको विश्वास कमजोर हुने संकेतका रूपमा पनि यसलाई लिन सकिन्छ।
नेपाल एयरलाइन्स र त्रिभुवन अन्तर्राष्ट्रिय विमानस्थल नेपाल आउने अधिकांश विदेशीका लागि देशको पहिलो परिचय हुन्। पहिलो अनुभव नै अव्यवस्थित, लामो प्रतीक्षा र कमजोर सेवाले भरिएको भए त्यसको असर केवल एउटा यात्रामा सीमित रहँदैन।त्यसले नेपालको समग्र छविमा प्रभाव पार्न सक्छ।
निस्सन्देह, कुनै पनि सामाजिक सञ्जाल पोस्ट एकपक्षीय अनुभव हुन सक्छ। त्यसमा उठाइएका सबै दाबी सम्बन्धित निकायबाट पुष्टि हुन बाँकी हुन सक्छन्। तर यस्ता गुनासा पटक–पटक सार्वजनिक भइरहेका छन् भने ती विषयलाई गम्भीर रूपमा सुन्नु र आवश्यक सुधारका लागि पहल गर्नु सम्बन्धित निकायको दायित्व हो।
प्रश्न एउटै छ,जनताको आवाज कहिले सुनिन्छ? यात्रुले भोगेको सास्ती कहिले अन्त्य हुन्छ? राष्ट्रिय ध्वजावाहक नेपाल एयरलाइन्स र त्रिभुवन अन्तर्राष्ट्रिय विमानस्थलले सेवामा सुधार गरेर यात्रुको विश्वास कहिले जित्छ?
आलोचनालाई विरोधका रूपमा होइन, सुधारको अवसरका रूपमा लिन सकियो भने मात्र यस्ता गुनासा दोहोरिन छाड्नेछन्। जनताको विश्वास जित्ने सबैभन्दा प्रभावकारी उपाय राम्रो सेवा, जवाफदेहिता र जिम्मेवार व्यवस्थापन नै हो।
