प्रहरी महानिरीक्षक दान बहादुर कार्कीद्वारा मोरङमा न्यानो कपडा वितरण

मोरङ।प्रहरी महानिरीक्षक दान बहादुर कार्कीले मिति २०८२ साल ९ महिनाको १६ गते मोरङ जिल्लाको बुढीगंगा गाउँपालिका अन्तर्गतका विभिन्न वडाका नागरिकहरूलाई न्यानो कपडा वितरण गर्नुभएको छ।

जाडो मौसमका कारण दैनिक जीवनमा कठिनाइ भोगिरहेका विपन्न, ज्येष्ठ नागरिक, बालबालिका तथा असहाय वर्गलाई लक्षित गर्दै न्यानो कपडा वितरण कार्यक्रम आयोजना गरिएको हो। कार्यक्रममा प्रहरी महानिरीक्षक कार्कीले समाजका कमजोर वर्गलाई सहयोग गर्नु राज्य तथा सबै नागरिकको साझा दायित्व भएको बताउनुभयो।

उहाँले प्रहरी सेवा केवल शान्ति सुरक्षा कायम गर्ने कार्यमा मात्र सीमित नभई सामाजिक उत्तरदायित्व निर्वाह गर्न पनि प्रतिबद्ध रहेको उल्लेख गर्नुभयो। यस्ता मानवीय कार्यले प्रहरी र जनताको सम्बन्ध अझ सुदृढ हुने उहाँको भनाइ थियो।

कार्यक्रममा स्थानीय जनप्रतिनिधि, प्रहरी अधिकारी तथा स्थानीयवासीहरूको उपस्थिति रहेको थियो। न्यानो कपडा पाएपछि स्थानीय नागरिकहरूले खुशी व्यक्त गर्दै प्रहरी प्रशासनप्रति धन्यवाद ज्ञापन गरेका छन्।