इटहरी/तरहरा कोरा च्यालेन्ज २०८२ भव्य रूपमा सम्पन्न,पाँच सयभन्दा बढीको सहभागिता
इटहरी-इटहरी र तरहरामा आयोजित कोरा च्यालेन्ज २०८२ भव्य रूपमा सम्पन्न भएको छ, जहाँ ५०० भन्दा बढी उत्साही सहभागीहरूले सक्रिय सहभागिता जनाए। कार्यक्रममा बालबालिका, युवायुवतीदेखि वरिष्ठ नागरिकसम्मको उत्साहजनक उपस्थिति देखिएको थियो।
कार्यक्रमको शुरुवात किड्स कोरा ११.३ किमी दौड बाट गरिएको थियो, जसमा १५० बालबालिकाले हर्षोल्लासपूर्वक सहभागिता जनाए। मुख्य सिनियर कोरा ३५ किमी दूरीको थियो, जसको समापन बहुभाषी आधारभूत विद्यालय परिसरमा गरियो।
साइकलिङ यात्राका क्रममा इटहरी जेसिज, इटहरी लेडी जेसिज, लायन्स क्लब अफ इटहरी इनोभेसन र लियो क्लब अफ इटहरी इनोभेसन जस्ता संस्थाहरूले पानी, फ्रुटी र फलफूल वितरण गर्दै सहभागीहरूको हौसला बढाएका थिए। साइक्लिस्टहरू पश्चिम पकली हुँदै उत्तरतर्फ लागेका थिए।
समापन समारोहलाई सशस्त्र प्रहरी बलका डीआईजी श्री कृष्ण न्यौपाने लगायत विशिष्ट अतिथिहरूले सम्मानजनक उपस्थिति दिएका थिए। कार्यक्रममा साइकल क्लबहरू, सहायक संस्थाहरू, साथै शारीरिक रूपमा सबल नभएका साइकलिस्टहरूका संघर्षलाई विशेष सम्मान प्रदान गरिएको थियो।
यसबाहेक, कार्यक्रममार्फत समाजमा निःशुल्क शिक्षण गरिरहेका शिक्षकहरूलाई समेत सम्मान गरिएको छ, जसले गरिब तथा दलित समुदायका बालबालिकालाई शिक्षा प्रदान गर्दै आएका छन्।
कार्यक्रम संयोजक सुरज लामा तामाङले सफलताका लागि सबै सहयोगी संस्था, सहभागी र स्वयंसेवकलाई धन्यवाद दिँदै आगामी दिनमा अझ प्रभावशाली कार्यक्रमहरू ल्याउने प्रतिबद्धता व्यक्त गरे।
