बाढीपहिरो पीडितको उद्धार र पुनर्निर्माणमा अमेरिकाको सहयोग रहने प्रतिबद्धता
काठमाडौं।नेपालका लागि अमेरिकी राजदूतावासकी नवनियुक्त चार्ज डि अफेयर्स मेगन बौलिनले परराष्ट्रमन्त्री शिशिर खनालसँग शिष्टाचार भेटवार्ता गरेकी छन्।
सिंहदरबारस्थित परराष्ट्र मन्त्रालयमा भएको भेटका क्रममा चार्ज डि अफेयर्स बौलिनले हालैको बाढीपहिरोबाट प्रभावित नागरिकहरूप्रति गहिरो समवेदना व्यक्त गर्दै नेपाल सरकार र नेपाली जनताप्रति अमेरिकी सरकारको ऐक्यबद्धता दोहोर्याइन्।
उनले विपद्को यस कठिन घडीमा उद्धार, राहत, पुनरुत्थान तथा पुनर्निर्माणका कार्यमा नेपाललाई हरसम्भव सहयोग गर्न अमेरिकी सरकार तयार रहेको बताइन्।
भेटमा परराष्ट्रमन्त्री शिशिर खनालले विपद्का बेला नेपाललाई अमेरिकी सरकार र जनताले पुर्याएको सहयोग तथा देखाएको ऐक्यबद्धताप्रति हार्दिक आभार व्यक्त गरे।मन्त्री खनालले नेपालको आगामी पुनर्स्थापना तथा पुनर्निर्माणका चरणहरूमा समेत अमेरिकी सरकारको सहयोग र सहकार्य निरन्तर प्राप्त हुने विश्वास व्यक्त गरे।
भेटवार्ताले विपद् व्यवस्थापन, मानवीय सहायता तथा पुनर्निर्माणका क्षेत्रमा नेपाल र अमेरिकाबीचको सहकार्यलाई थप सुदृढ बनाउने अपेक्षा गरिएको छ।
