ठगी गर्ने पोखराका ट्राभल कम्पनीका दुई सञ्चालक पक्राउ

पोखरा।विदेश भ्रमणका आकर्षक प्याकेजको प्रलोभन देखाउँदै सर्वसाधारणबाट रकम असुली ठगी गरेको आरोपमा प्रहरीले पोखरास्थित एक ट्राभल कम्पनीका दुई सञ्चालकलाई पक्राउ गरेको छ ।

कास्की प्रहरीले पोखरा महानगरपालिका–५, पर्स्याङस्थित ‘ओसिस टुरिजम इन्टरनेसनल’ मा छापा मारेर कम्पनीका सञ्चालक सप्तरीको कञ्चनपुर नगरपालिका–१२ का २६ वर्षीय विवेक रेग्मी र भारतको कर्नाटक राज्य, सान्तीनगरका मोहम्मद यासेरलाई पक्राउ गरेको हो ।

प्रहरीले कम्पनीको कार्यालयबाट कम्प्युटरलगायत महत्वपूर्ण सामग्रीसमेत बरामद गरेको जनाएको छ । प्रारम्भिक अनुसन्धानका क्रममा कम्पनी नेपाली नागरिकको नाममा दर्ता भए पनि यसको मुख्य योजनाकार भारतीय नागरिक रहेको खुलेको प्रहरीको दाबी छ ।

प्रहरीका अनुसार कम्पनीले दुबई, सिंगापुर, मलेसिया र थाइल्याण्डलगायत देशमा सस्तो प्याकेजमा भ्रमण गराउने भन्दै ग्राहकलाई आकर्षित गर्ने गरेको थियो । प्रतिव्यक्ति ४ देखि ५ लाख रुपैयाँसम्मको प्याकेज बनाएर किस्ताबन्दीमा रकम असुल्ने र पूर्ण भुक्तानी भएपछि कम्पनी बन्द गरी सञ्चालकहरू फरार हुने योजनाअनुसार ठगी गर्ने गरेको प्रारम्भिक अनुसन्धानबाट खुलेको प्रहरीले जनाएको छ ।

कास्की प्रहरीका डीएसपी नमराज भट्टराईका अनुसार विभिन्न आकर्षक अफर देखाएर ग्राहकलाई किस्ताबन्दीमा रकम बुझाउन लगाउने गरिएको थियो । छापा मार्ने क्रममा कम्पनीमा कार्यरत १५ जना युवतीलाई समेत प्रहरीले फेला पारेको थियो । उनीहरूलाई आवश्यक सोधपुछ तथा सम्झाइबुझाइपछि अभिभावकको जिम्मा लगाइएको प्रहरीले जनाएको छ ।

घटनामा संलग्न अन्य दुई जना सञ्चालक भने फरार रहेको प्रहरीले जनाएको छ । उनीहरूको खोजी भइरहेको तथा घटनाबारे थप अनुसन्धान जारी रहेको कास्की प्रहरीले जनाएको छ ।