बेङ्लुरुमा नेपाली युवतीलाई हेयर ड्रेसरले हत्या गरेको दाबी, ४० होइन ५९ टुक्रामा थियो शव

भारतको बेङ्लुरुमा नेपाली युवती महालक्ष्मीको हत्या प्रकरणमा भारतीय प्रहरीले महत्त्वपूर्ण क्लू फेला पारेको छ । भारतीय सञ्चारमाध्यमहरूका अनुसार प्रहरी हत्यारा नजिक पुगेको छ । प्रहरीले हत्यारा एक हेयर ड्रेसर भएको समेत बताएको छ ।

भारतीय सञ्चारमाध्यमहरूका अनुसार हत्यारा भारतकै पश्चिम बंगालको हो । ऊ हत्यापछि भुवनेश्वरहुँदै पश्चिम बंगाल पुगेको प्रहरीले मोबाइल ट्र्याकिङबाट पत्ता लगाएको छ । साथै, प्रहरी हत्याराको आफन्तसम्म पुगिसकेको जनाइएको छ । प्रहरीले हत्याराका भाइसँग भेट गरी हत्यामा उसको संलग्नताबारे महत्त्वपूर्ण जानकारी प्राप्त गरेको जनाइएको छ । हत्याराले हत्याकै दिन भाइलाई फोन गरी आफूले महालक्ष्मीको हत्या गरेको जानकारी दिएको समेत खुलेको छ । प्रहरीले हत्यारालाई पक्राउ गर्न ओडिसा र पश्चिम बंगालमा प्रहरी टोली परिचालन गरेको छ ।

भारतीय सञ्चारमाध्यमहरूका अनुसार महालक्ष्मीको घर नेपाल हो । तर, नेपालको कहाँ हो भन्नेबारेमा भने केही खुलाइएको छैन । तर, उनको परिवार लामो समयदेखि बेङ्लोरमै बस्दै आएको बताइएको छ । महालक्ष्मीको शव पोस्टमार्टमपछि परिवारलाई बुझाइएको र उनको अन्तिम संस्कारसमेत भइसकेको छ । प्रहरीका अनुसार पोस्टमार्टपछि उनको शव ५९ टुक्रामा रहेको पत्ता लागेको छ । यसअघि ३० देखि ४० टुक्रामा शव रहेको बताइएको थियो ।

२१ सेप्टेम्बरमा युवतीको शव बेङ्लुरुको एक तीनतले भवनको पहिलो तलामा रहेको कोठामा भेटिएको थियो । उनको शव फ्रिजमा राखेको अवस्थामा प्रहरीले फेला पारेको थियो ।