आज साउनको पहिलो सोमबार : देशभरका शिवालयमा भक्तजनको घुइँचो, शिवआराधनामा श्रद्धालु

काठमाडौं।साउन महिनाको पहिलो सोमबारका अवसरमा आज बिहानैदेखि देशभरका शिवालयमा भक्तजनको उल्लेख्य भीड लागेको छ। राजधानीस्थित पशुपतिनाथ मन्दिरसहित विभिन्न शिवालयमा दर्शन, पूजा–आराधना र जलाभिषेक गर्ने श्रद्धालुको घुइँचो देखिएको छ।

हिन्दु धर्ममा साउन महिनालाई भगवान् शिवको अत्यन्त प्रिय महिना मानिन्छ। यस महिनाको प्रत्येक सोमबार व्रत बसेर भगवान् शिवको पूजा, जप, तप, अभिषेक तथा दान–पुण्य गर्ने परम्परा रहिआएको छ। धार्मिक मान्यताअनुसार श्रद्धापूर्वक शिवआराधना गर्दा मनोकामना पूरा हुने, पाप नाश हुने, मानसिक शान्ति प्राप्त हुने तथा परिवारमा सुख, शान्ति र समृद्धि आउने विश्वास छ। 

साउन सोमबारका अवसरमा पशुपतिनाथ, डोलेश्वर महादेव, किराँतेश्वर, हलेसी महादेव, देवघाटलगायत देशभरका प्रमुख शिव मन्दिरमा भक्तजनले बिहानैदेखि पूजा, रुद्राभिषेक र विशेष आरतीमा सहभागिता जनाइरहेका छन्। सुरक्षा व्यवस्था, दर्शनको व्यवस्थापन तथा भक्तजनको सहज आवागमनका लागि सम्बन्धित निकायले विशेष तयारी गरेका छन्।