प्रचण्डको चेतावनी रामहरि खतिवडालाई: “राजीनामा दिनुस्, तपाईंको पदमा बस्ने नैतिक अधिकार छैन”

काठमाडौं-नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले प्रतिनिधिसभा अन्तर्गतको राज्य व्यवस्था तथा सुशासन समितिका सभापति रामहरि खतिवडालाई कडा चेतावनी दिएका छन्। उनले खतिवडालाई पद त्याग्न आग्रह गर्दै भने, “तपाईंलाई अब पदमा बस्ने नैतिक अधिकार छैन, तत्काल राजीनामा दिनुस्।”

‘कुलिङ पिरियड’सम्बन्धी विधेयकमा देखिएको त्रुटि समितिले स्वयं स्वीकार गरिसकेको सन्दर्भ उठाउँदै प्रचण्डले खतिवडाको भूमिकाप्रति प्रश्न उठाए। “उहाँले नैतिक जिम्मेवारी लिएर राजीनामा दिनुभयो भने उहाँकै लागि राजनीतिक रूपले लाभदायक हुनेछ। जबरजस्ती पदमा बस्ने प्रयास गलत हुनेछ,” उनले स्पष्ट शब्दमा भने।

प्रचण्डका अनुसार समितिको गल्ती स्वीकार गर्दै राष्ट्रियसभालाई पत्र समेत पठाइसकिएको छ, जसले गर्दा अब उक्त गल्तीको नैतिक भार सिंगो प्रतिनिधिसभामाथि परेको छ। यस्तो अवस्थामा समितिका सभापति रहनु नैतिक रुपमा उपयुक्त नहुने उनको तर्क छ।

यसैबीच, खतिवडाले भने हालसम्म राजीनामा दिन कुनै संकेत गरेका छैनन्। तर सत्तारूढ दलकै अध्यक्षबाट आएको सार्वजनिक चेतावनीपछि राजनीतिक वृत्तमा यसको असर देखिने अनुमान गरिएको छ।