मालती मंगले’को सिड्नीमा रेड कार्पेट प्रिमियर, ३०० भन्दा बढी दर्शक सहभागी

काठमाडौं।नेपाली चलचित्र ‘मालती मंगले’को अस्ट्रेलियाको सिड्नीस्थित ग्रान्ड प्यालेस ओभनमा रेड कार्पेट प्रिमियर सम्पन्न भएको छ।

निर्माता तथा गायक रामकृष्ण ढकालका अनुसार प्रिमियरसँगै आयोजित भीआईपी डिनर शोमा करिब २०० सिट क्षमताको हलमा ३०० भन्दा बढी दर्शक सहभागी भएका थिए। कार्यक्रममा सिड्नीमा रहेका नेपाली समुदायको उल्लेख्य उपस्थिति रहेको थियो।

प्रदर्शनपछि आयोजित कार्यक्रममा ढकालले दर्शकबाट प्राप्त प्रतिक्रियाप्रति खुसी व्यक्त गर्दै कार्यक्रम सफल बनाउन सहयोग गर्ने आयोजक माउन्ट पुमोरीको टोली, संयोजक शोभित बस्नेत, सुबास थापा, प्रायोजक तथा निर्माण टोलीप्रति आभार व्यक्त गरे।

चलचित्र प्रदर्शनपछि ढकालले आफ्ना आठ गीत प्रस्तुत गरेका थिए। उनलाई ‘द भ्वाइस अफ नेपाल’बाट परिचित गायिका अञ्जली हमालले चारवटा युगल गीतमा साथ दिएकी थिइन्।

निर्माण पक्षका अनुसार सिड्नी प्रिमियर चलचित्रको अन्तर्राष्ट्रिय प्रदर्शन अभियानअन्तर्गत आयोजना गरिएको हो। यसअघि चलचित्र अमेरिका र क्यानडाका विभिन्न सहरमा समेत प्रदर्शन भइसकेको छ।

रानी फिल्म्स र युनि इन्टरटेनमेन्टको सहकार्यमा निर्माण भएको चलचित्रका निर्देशक तथा कथाकार प्रकु पाण्डेय हुन्। पटकथा तथा संवादमा संयोग गुरागाईंले सहकार्य गरेका छन्।

चलचित्रमा वर्षा राउत, विजय बराल, मेक्सम गौडेल, शकु शाह, प्रकाश घिमिरे, सरिता गिरी, नरिन थापा, मान्सु सापकोटा, सुस्मा निरौला र सुनिल तामाङलगायत कलाकारको अभिनय रहेको छ।

सागर ज्ञवाली कार्यकारी निर्माता रहेको चलचित्रमा बाबु सुवेदी, रबिन श्रेष्ठ, वेदना कर्माचार्य, पद्मावती गुरुङ, स्वीकृति बस्नेत र मिलन बजगाईं सहनिर्माता छन्। चलचित्रको छायांकन महेश पौडेल, सम्पादन रोमी मोजेज, रङ संयोजन कृष्ण भण्डारी, पृष्ठभूमि संगीत सुजिल कर्माचार्य तथा साउन्ड मिक्सिङ डिकेश खड्गीले गरेका छन्।