कलाकार सागर लम्साल ‘बले’ ‘पाँच पाण्डव’बाट निष्कासित, रि–सुट हुने

काठमाडौं:अमेरिकामा अध्ययनरत एक युवतीले सामाजिक सञ्जालमार्फत कलाकार सागर लम्साल ‘बले’माथि बलात्कारको आरोप लगाएपछि उनलाई चलचित्र *‘पाँच पाण्डव’*बाट निष्कासन गरिएको छ।

निर्माण कम्पनी *कालीरानी फिल्म्स प्रा.लि.*ले चैत २० गते जारी गरेको प्रेस विज्ञप्तिमा नैतिकताका आधारमा लम्साललाई फिल्मबाट हटाउने निर्णय गरिएको उल्लेख गरिएको छ। साथै, उनको स्थानमा नयाँ कलाकार लिएर पुनः छायांकन (रि–सुट) गरिने जानकारी दिइएको छ।

विज्ञप्तिअनुसार चैत २ गतेदेखि झापा आसपासमा चलचित्रको छायांकन भइरहेको थियो। सागर लम्सालका करिब ९० प्रतिशत दृश्यहरू खिचिसकिएको अवस्थामा विवाद सार्वजनिक भएपछि निर्माण टिमले यस्तो निर्णय लिएको हो।

निर्माण पक्षले लम्साल संलग्न सबै दृश्यहरू चलचित्रमा समावेश नगरिने स्पष्ट पार्दै ती दृश्यहरू पुनः खिचिने जनाएको छ। साथै, फिल्मको कामलाई निरन्तरता दिँदै निर्धारित समयमै सम्पन्न गर्ने तयारी भइरहेको पनि जनाएको छ।