फेवाताल किनार उत्सवमय,२७औँ पोखरा स्ट्रिट फेस्टिभल नजिकिँदै

काठमाडौं।आगामी २७औँ पोखरा सडक महोत्सव नजिकिँदै गर्दा पोखरा शहर पुनः उत्सवको रौनकमा रंगिन थालेको छ। फेवाताल किनारदेखि प्रमुख सडकमार्गसम्म रंगीन बत्ती, सांगीतिक माहोल र स्थानीय परिकारको सुवासले शहरलाई भव्य उत्सव–मञ्चमा रूपान्तरण गर्ने तयारी तीव्र भएको छ।

बिहीबार आयोजित पत्रकार सम्मेलनमा Restaurant & Bar Association of Nepal–Pokhara (रेवान) ले यस वर्षको महोत्सवलाई पोखराको समृद्ध संस्कृति, स्थानीय समुदायको पहिचान र पर्यटनका विशेषतालाई अझ प्रभावशाली रूपमा प्रस्तुत गर्ने योजना सार्वजनिक गरेको छ।

आयोजक रेवानका अनुसार पोखरा सडक महोत्सवले विगत २६ वर्षदेखि स्थानीय व्यवसाय, पर्यटन र सांस्कृतिक पहिचानलाई प्रवर्द्धन गर्दै आएको छ। हरेक वर्ष बढ्दो सहभागीता, सहयोग र विश्वासका कारण महोत्सवको भव्यता तथा आकर्षणमा निरन्तर वृद्धि भइरहेको बताइएको छ।

यस वर्ष पनि देश–विदेशका पर्यटक, स्थानीय समुदाय र सरोकारवालाको सहभागीता महोत्सवलाई अझ जीवन्त बनाउने अपेक्षा गरिएको छ। आयोजकले आगामी दिनहरूमा सडक महोत्सवलाई पोखराको प्रमुख सांस्कृतिक–पर्यटन ब्रान्डका रूपमा थप मजबुत बनाउन निरन्तर काम गर्ने प्रतिबद्धता व्यक्त गरेका छन्।