काठमाडौं।नेपाल प्रिमियर लिग (NPL) २०२६ को फाइनल खेलको टिकट बिक्री प्रक्रियालाई लिएर क्रिकेटप्रेमीहरूले असन्तुष्टि व्यक्त गरेका छन्। टिकट बिक्री खुल्नेबित्तिकै बुकिङ गर्न खोज्दा केही दर्शकले एक सेकेन्डमै ‘Unable’ सन्देश देखिएको गुनासो गरेका छन्।
दर्शकका अनुसार टिकट बिक्री सुरु भएको एक मिनेट नबित्दै अनलाइन टिकटिङ प्लेटफर्ममा फाइनल खेलका टिकट ‘Sold Out’ देखिन थालेका थिए। यससँगै फाइनल खेल प्रत्यक्ष हेर्ने तयारीमा रहेका धेरै समर्थक टिकट खरिद गर्नबाट वञ्चित भएका छन्।
टिकट बिक्री सुरु भएको केही सेकेन्डमै सबै टिकट सकिएको हो वा टिकटिङ प्रणालीमा प्राविधिक समस्या आएको हो भन्ने विषयमा दर्शकहरूले प्रश्न उठाएका छन्।
सामाजिक सञ्जालमा समेत टिकट बिक्री प्रक्रियाको विश्वसनीयता र पारदर्शितामाथि प्रश्न उठ्न थालेको छ। टिकट बिक्री सुरु भएलगत्तै बुकिङ असफल हुनु र केही समयमै ‘Sold Out’ देखिनुले टिकट व्यवस्थापनमा शंका उत्पन्न गरेको दर्शकहरूको भनाइ छ।
यद्यपि, टिकट वास्तवमै बिक्री भएर सकिएको हो वा प्रणालीमा आएको समस्याका कारण यस्तो अवस्था देखिएको हो भन्नेबारे आधिकारिक पुष्टि हुन बाँकी छ।
क्रिकेटप्रेमीहरूले टिकट बिक्रीको वास्तविक विवरण सार्वजनिक गर्न, सम्भावित प्राविधिक समस्याबारे स्पष्ट पार्न र सम्पूर्ण प्रक्रियालाई पारदर्शी बनाउन सम्बन्धित आयोजक तथा टिकटिङ व्यवस्थापकसँग माग गरेका छन्।
अब मुख्य प्रश्न एउटै छ—NPL फाइनलको टिकट साँच्चिकै एक मिनेटमै सकिएको हो, कि टिकट बिक्री प्रणालीमै समस्या आएको हो?






