नेपालगञ्ज।नेपाली चलचित्र ‘बाः एक योद्धा’ले काठमाडौंभन्दा बाहिरका दर्शकमाझ आफ्नो अडियन्स प्रिमियर सुरु गरेको छ । नेपाली चलचित्रहरू प्रायः काठमाडौंमा प्रिमियर तथा विशेष प्रदर्शन गरेपछि मोफसलका दर्शकमाझ पुग्ने परम्परा रहे पनि ‘बाः एक योद्धा’ले भने त्यसको विपरीत यात्रा तय गरेको हो।
चलचित्रले काठमाडौंअघि नै नेपालगञ्ज, दाङ, धरान र बुटवलका दर्शकमाझ अडियन्स प्रिमियर सम्पन्न गरिसकेको निर्माण पक्षले जनाएको छ । चार प्रमुख सहरका दर्शकबाट चलचित्रप्रति सकारात्मक प्रतिक्रिया प्राप्त भएको निर्माण पक्षको दाबी छ ।
मोफसलका दर्शकसँग प्रत्यक्ष रूपमा जोडिने उद्देश्यले काठमाडौं बाहिरबाट प्रिमियर सुरु गरिएको निर्माण पक्षले जनाएको छ । चलचित्रप्रति दर्शकको प्रतिक्रिया र चासो बुझ्नका लागि पनि मोफसलमा गरिएको प्रिमियर महत्वपूर्ण रहेको बताइएको छ ।
चारवटा प्रमुख सहरमा प्रिमियर सम्पन्न गरेपछि अब चलचित्र ‘बाः एक योद्धा’को काठमाडौं प्रिमियर गर्ने तयारी भइरहेको छ । निर्माण पक्षका अनुसार असोज ६ गते काठमाडौंमा चलचित्रको विशेष प्रिमियर आयोजना गरिनेछ ।
मोफसलमा प्राप्त दर्शक प्रतिक्रियापछि काठमाडौं प्रिमियरलाई लिएर निर्माण पक्ष उत्साहित देखिएको छ । चलचित्रले काठमाडौंका दर्शकमाझ कस्तो प्रतिक्रिया पाउँछ भन्ने चासो बढेको छ ।
