मकालु लाक्पा शेर्पाको अर्को कीर्तिमान:आठ दिनमै चार पटक कार्स्टेन्स पिरामिड आरोहण
काठमाडौ।प्रसिद्ध नेपाली पर्वतारोही लाक्पा शेर्पा, जो मकालु लाक्पा भनेर परिचित छन्,ले ओसियानियाको सबैभन्दा अग्लो शिखर कार्स्टेन्स पिरामिड (पुनकजया४८८४मि) चारपटक लगातार आठ दिनभित्र सफल आरोहण गर्दै दुर्लभ उपलब्धि हासिल गरेका छन्।
लाक्पाले क्रमशः अक्टोबर १९, २२, २४ र २७ का दिन चार पटक शिखर चुमेका हुन्। उनले प्रत्येक पटक अन्तर्राष्ट्रिय आरोही टोलीका दुई सदस्यलाई १४ पिक एक्सपेडिसन समूहमार्फत शीर्षसम्म सफलतापूर्वक पुर्याएका थिए।
शिखरबाट फर्किएपछि लाक्पाले भने, “यो मेरो आठ दिनभित्रको चौथो आरोहण हो। यसले मलाई ‘सेभेन समिट्स’ पूरा गर्ने लक्ष्यतर्फ अझ नजिक पुर्याएको छ।”
यस उपलब्धिसँगै लाक्पाले अबसम्म सेभेन समिट्स मध्ये चार शिखर—
सगरमाथा (एशिया)
किलिमान्जारो (आफ्रिका)
एल्ब्रुस (युरोप)
कार्स्टेन्स पिरामिड (ओसियानिया)
सफल आरोहण गरिसकेका छन्।
उनका बाँकी लक्ष्यहरूमा डेनाली (उत्तर अमेरिका), एकोनकागुवा (दक्षिण अमेरिका) र माउन्ट विन्सन (एन्टार्कटिका) रहेका छन्।
संकुवासभा जिल्लाको मकालु गाउँपालिकाका स्थायी बासिन्दा लाक्पा शेर्पा विश्वको पाँचौं अग्लो पर्वत मकालु (८,४८५ मि.) मा आठ पटक सफल आरोहण गरिसकेका छन्, जुन विश्वकै सबैभन्दा बढी पटकको रेकर्ड हो।
सन् २०२२ मा उनले सोही पर्वतमा १६ दिनभित्र तीन पटक शिखर चुम्दै गिनिज वर्ल्ड रेकर्ड समेत बनाएका थिए।
उनले आफ्नो करियरमा छो ओयू, मनास्लु, ल्होत्से र आमादब्लम जस्ता नेपालका कठिन र प्रतिष्ठित हिमालहरू पनि सफलतापूर्वक आरोहण गरेका छन्।
कार्स्टेन्स पिरामिडमा उनको यो नयाँ उपलब्धिले लाक्पा शेर्पालाई पुनः विश्व पर्वतारोहण समुदायको ध्यानाकर्षण केन्द्रमा पुर्याएको छ।
उनको अदम्य साहस, नेतृत्व क्षमता र समर्पणले उनी आज पनि हिमालको आत्मा र नेपाली पर्वतारोहणको गौरवको प्रतीक बनेका छन्।
