काठमाडौं।अभिनेत्री रेखा थापा र निर्देशक सबिर श्रेष्ठको सहकार्यमा निर्माण भएको फिल्म ‘छत्तीसको आँकडा’को प्रदर्शन मिति तय भएको छ । निर्माण पक्षका अनुसार फिल्म आगामी मंसिर १७ गतेदेखि देशभरका हलमा प्रदर्शनमा आउनेछ ।
सोमबार अभिनेत्री रेखा थापाले सञ्चालन गर्दै आएको बीआर क्याफेमा अभिनेत्री निरुता सिंहको जन्मदिनको अवसर पारेर फिल्मको प्रदर्शन मिति सार्वजनिक गरिएको हो ।
रेखा फिल्मस् र काइट्स इन्टरटेन्मेन्टको सहकार्यमा निर्माण भएको फिल्मले प्रदर्शन मिति तय भएसँगै प्रचारप्रसारलाई समेत तीव्रता दिने तयारी गरेको छ । निर्माण पक्षका अनुसार घटस्थापनाको अवसरमा फिल्मको पहिलो गीत सार्वजनिक गरिनेछ ।
सबिर श्रेष्ठको निर्देशनमा बनेको फिल्मको कथा दुई महिला पात्रबीचको द्वन्द्वलाई केन्द्रमा राखिएको छ । फिल्ममा अभिनेत्री रेखा थापा र पूजा शर्मालाई फरक भूमिकामा प्रस्तुत गरिएको छ ।
यसअघि सार्वजनिक गरिएको फिल्मको पोस्टरले पनि रेखा र पूजाबीचको पर्दामा देखिने टकरावलाई संकेत गरेको थियो । दुई अभिनेत्रीको फरक शैली र भूमिकाले फिल्मप्रति दर्शकको चासो बढाउने अपेक्षा निर्माण पक्षको छ ।
फिल्मको अन्य कलाकार तथा प्राविधिक पक्षबारे निर्माण पक्षले क्रमशः जानकारी सार्वजनिक गर्दै जाने जनाएको छ । प्रदर्शन मिति तय भएसँगै अब फिल्मको प्रचार अभियानलाई थप गति दिने तयारी गरिएको छ ।
