अमेरिकन स्पेसेस नेटवर्कद्वारा स्टार्टअपका लागि एआई कार्यशाला सम्पन्न

काठमाडौं।अमेरिकी दूतावास नेपालले काठमाडौँमा एआई (Artificial Intelligence) केन्द्रित एक गहन कार्यशाला आयोजना गरेको छ। उक्त कार्यक्रममा २० जना उद्यमी तथा पेशागत व्यक्तिहरूको सहभागिता रहेको थियो।

कार्यशालामा व्यवसाय स्वचालन, सामाजिक सञ्जाल सामग्री निर्माण, डेटा विश्लेषण तथा अमेरिकी एआई प्रविधिहरूको प्रयोगमार्फत निर्णय क्षमता र तर्कशक्ति विकास गर्ने विषयमा व्यवहारिक प्रशिक्षण दिइएको थियो।

U.S. Embassy Nepal को सहकार्यमा, Nepalese Young Entrepreneurship Forum र The Empowered Women सँगको साझेदारीमा सम्पन्न उक्त कार्यक्रमले सहभागीहरूलाई दैनिक कार्यहरू स्वचालित बनाउने, उत्पादकत्व वृद्धि गर्ने तथा विस्तारयोग्य र प्रतिस्पर्धी व्यवसाय निर्माण गर्ने व्यावहारिक रणनीतिहरू प्रदान गरेको थियो।

कार्यशालाको अन्त्यमा आयोजित नेटवर्किङ सत्रले सहभागीहरूबीच सहकार्य र ज्ञान आदान–प्रदानलाई थप मजबुत बनाएको थियो।

यस एआई कार्यशाला कार्यक्रमले नेपालमा डिजिटल सीप विकास र नवप्रवर्तनलाई प्रवर्द्धन गर्दै नयाँ आर्थिक अवसर सिर्जना गर्ने अपेक्षा गरिएको छ। साथै, यसले नेपाल–अमेरिका सम्बन्धलाई अझ सुदृढ बनाउने र अमेरिकी प्रविधि क्षेत्रमा लगानी तथा सहकार्यका अवसरहरू विस्तार गर्ने विश्वास लिइएको छ।