नेपालले २०२६ वसन्त यामका लागि २८ देशका ११४ पर्वतारोहीलाई आरोहण अनुमति जारी
काठमाडौं । नेपाल सरकारले सन् २०२६ को वसन्त ऋतुको आरोहण यामका लागि २८ देशका ११४ जना पर्वतारोहीलाई विभिन्न हिमाल आरोहणका लागि अनुमति दिएको छ।
पर्यटन विभागका अनुसार मार्च १ देखि मार्च ३१, २०२६ सम्म जारी गरिएका अनुमति पत्रहरू ६ हजार मिटरदेखि ८ हजार मिटरभन्दा अग्ला १० वटा हिमालका लागि हुन्। अनुमति पाएका हिमालहरूमा धौलागिरी–१ (८,१६७ मिटर), अन्नपूर्ण–१ (८,०९१ मिटर), अन्नपूर्ण–४ (७,५२५ मिटर), आमादब्लम (६,८१४ मिटर), खाङ्ग्री शार (६,८११ मिटर), सरिबुङ (६,३४६ मिटर), चुलु फार इस्ट (६,०३८ मिटर), थोरोङ पिक (६,११४ मिटर), सगरमाथा (८,८४८.८६ मिटर) र तेंगोमा (६,२१५ मिटर) रहेका छन्।
जारी अनुमति अनुसार कुल ११४ आरोहीमध्ये ८७ जना पुरुष र २७ जना महिला रहेका छन्। पछिल्लो समय उच्च हिमाली आरोहणमा महिलाको सहभागिता क्रमशः बढ्दै गएको विभागले जनाएको छ।
यस अवधिमा सरकारले आरोहण अनुमति वापत ४ लाख १२ हजार २०० अमेरिकी डलर राजस्व संकलन गरेको छ। पर्यटन विभागका अनुसार वसन्त याम नेपालका लागि सबैभन्दा व्यस्त आरोहण सिजन मानिन्छ, जसले देशको पर्यटन उद्योगमा महत्वपूर्ण योगदान पुर्याउने गर्दछ।
