मनाङको हुम्देमा सातौँ आइस क्लाइम्बिङ तालिम,हिमाली पर्यटनमा दक्ष जनशक्ति उत्पादनको लक्ष्य

काठमाडौं।नेपाल पर्यटन बोर्डले नेपाल माउन्टेन इन्स्ट्रक्टर्स एसोसिएसन (एनएमआईए)सँगको सहकार्यमा मनाङको हुम्दे क्षेत्रमा सातौँ आइस क्लाइम्बिङ लेभल–वान तालिम सुरु गरेको छ । माघ १३ गतेदेखि २२ गतेसम्म सञ्चालन हुने तालिम उच्च हिमाली क्षेत्रमै आधारित प्राविधिक र व्यवहारिक अभ्यासमा केन्द्रित रहेको छ ।

तालिमको औपचारिक सुरुवात माघ ९ गते काठमाडौंमा ‘सफ्ट ओपनिङ’ कार्यक्रममार्फत गरिएको थियो । सो अवसरमा सहभागीहरूलाई सैद्धान्तिक ज्ञान, सुरक्षा मापदण्ड र फिल्ड–आधारित तालिमका चुनौतीबारे अभिमुखीकरण गराइएको थियो।

आइस क्लाइम्बिङसम्बन्धी दक्षता अभिवृद्धि, अन्तर्राष्ट्रिय सुरक्षा मापदण्डको अभ्यास तथा पर्वतारोहण क्षेत्रमा रोजगारीका अवसर विस्तार गर्नु तालिमको मुख्य उद्देश्य रहेको नेपाल पर्यटन बोर्डले जनाएको छ । बोर्डका अनुसार, विश्वस्तरीय, सुरक्षित र व्यावसायिक पर्वतारोहण सेवाको विकास गर्दै हिमाली पर्यटन प्रवर्द्धन गर्ने दीर्घकालीन रणनीतिसँग यो तालिम जोडिएको छ ।

तालिममा ३६ जना सहभागी छन् भने उनीहरूलाई ११ जना अनुभवी तथा प्रमाणित प्रशिक्षकले प्रशिक्षण दिइरहेका छन् । पाठ्यक्रमअन्तर्गत आइस एक्स, क्र्याम्पन, हार्नेस, हेल्मेट, क्याराबिनर, बेलय डिभाइस, स्लिङ र डोरीजस्ता उपकरणको प्रयोग, डोरी फिक्सिङ, एंकर निर्माण, सुरक्षा प्रणाली, उद्धार प्रक्रिया तथा प्राविधिक पर्वतारोहणका व्यवहारिक अभ्यास समावेश गरिएको छ ।

हुम्देमा भइरहेको तालिमको स्थलगत अवलोकन गर्दै बोर्डका वरिष्ठ निर्देशक हिक्मत सिंह ऐयर र प्रबन्धक विमल कँडेलले हिमाली पर्यटनमा दक्ष जनशक्ति उत्पादनका लागि बोर्ड र एनएमआईएको सहकार्य प्रभावकारी हुने विश्वास व्यक्त गरेका छन् ।

तालिम सफलतापूर्वक सम्पन्न गर्ने सहभागीहरूले अन्तर्राष्ट्रिय मान्यताप्राप्त प्रमाणपत्र प्राप्त गर्नेछन् । यसले उनीहरूको व्यावसायिक विश्वसनीयता बढाउनुका साथै नेपाल तथा अन्तर्राष्ट्रिय पर्वतारोहण बजारमा रोजगारीका नयाँ अवसर सिर्जना हुने अपेक्षा गरिएको छ ।