बंगलादेशी नजीर पेश गर्दै प्रधानमन्त्री ओलीलाई अमरेशको चेतावनीः ‘गणितले मात्रै सरकार टिक्दैन’

काठमाडौँ ।प्रतिनिधि सभा सदस्य अमरेश कुमार सिंहले प्रधानमन्त्री केपी शर्मा ओलीलाई सरकार गणितबाट नचल्ने भन्दै चेतावनी दिएका छन् । शुक्रबार प्रतिनिधि सभाको बैठकबाट बाहिरिने क्रममा सञ्चारकर्मीहरुसँग संवाद गर्दै उनले संसद्मा बहुमत भएपनि बंगलादेशमा शेख हसिनाले सरकार टिकाउन नसकेको बताए । उनले जनताको सहयोगबाट मात्रै सरकार टिक्ने बताए ।

‘जनताको सहयोगबाट, जनताको पर्सेप्सनबाट सरकार चल्ने हो । गणितले सरकार चल्दैन । गणित त बंगलादेशमा पनि दुई तिहाइ थियो । शेख हसिनाको संसद्मा दुई तिहाइ गणित थियो नि । दुई तिहाइको गणितले शेख हसिनालाई टिकाउन सकेन । प्रधानमन्त्री के देशमै टिकाउन सकेन । जनताको दिनचार्य एकदम गाह्रो भइरहेको छ, युवाहरु पलायन भइरहेका छन्, रोजगारी पाइराखेका छैनन्, न्याय पाइराखेका छैनन् । जो दलमा लागेको छ, उसले जे लुटेपनि छुट । यो दलको नाममा जुन छुट छ, त्यो लामो चल्दैन,’– उनले भने ।

साथै, सामाजिक सञ्जाल नियमणसम्बन्धी विधेयकको विरोध गरिने पनि उनले बताए । २१औं शताब्दीमा नियमनको नाममा सामाजिक सञ्जालमा नियन्त्रण गर्न नसकिने उनको भनाइ छ । ‘सामाजिक सञ्जाल नियन्त्रण गर्ने विधेयकको विरुद्धमा हामी मतदान गर्छौं । सामाजिक सञ्जाल अहिलेको जमानामा नियन्त्रण गर्न मिल्दैन । नियमनको नाममा नियन्त्रण गर्न खोजिएको छ,’– उनले भने ।