रास्वपाका सभापति रवि लामिछानेलाई रातारात पोखरा लगिएको भन्दै सो पार्टीले आपत्ति
काठमाडौं।राष्ट्रिय स्वतन्त्र पार्टी रास्वपाका सभापति रवि लामिछानेलाई रातारात चितवनबाट पोखरा लगिएको भन्दै सो पार्टीले आपत्ति जनाएको छ ।
सरकारले राज्य संयन्त्रको दुरुपयोग गरी एक राजनितिक दलका नेतालाई विभिन्न बाहानामा यातना दिने, अमानवीय, अपमानजनक तथा गैरन्यायिक कार्य गरेको भन्दै रास्वपाले आपत्ति जनाएको हो । सरकारको कार्यलाई गैरन्यायिक चाल भएको टिप्पणी गर्दै रास्वपाले सभापति लामिछानेको निजी डायरी हिरासतबाटै गायव गरिएको आरोप लगाएको छ ।
सरकारको यस कार्यले नागरिकको नैसर्गिक मानवअधिकार हनन् गरेको र यो निर्मम कदमको औचित्य राज्यले पुष्टि गर्नुपर्ने रास्वपाले विज्ञप्तीमा भनेको छ । लामिछाने कसुरदार नभई एक आरोपित मात्र भएको र सरकारको कानुनी प्रक्रियामा साथ दिएर नागरिक कर्तव्य निर्वाह गरिरहेको पार्टीले विज्ञप्तिमा भनेको छ । सरकारको कार्य संविधानको धारा १८, धारा २२ तथा मुलुकी अपराध संहिता, २०७४ को दफा १६७ एवम् यातना र अन्य क्रूर, अमानवीय वा अपमानजनक व्यवहार वा सजाय विरुद्धको महासन्धि, १९८४ विपरीत भएको रास्वपाको ठहर छ ।
