काठमाडौं महानगर प्रहरी दिवसमा मेयर शाहद्वारा प्रशंसा

काठमाडौं।काठमाडौं महानगर प्रहरीको ३४औं स्थापना दिवसका अवसरमा मेयर बालेन्द्र शाह (बालेन) ले महानगर प्रहरीको कार्यप्रति प्रशंसा व्यक्त गरेका छन् । शनिबार काठमाडौंमा आयोजित कार्यक्रममा उनले महानगरपालिकाको पहिचान बनाउन नगर प्रहरीले महत्वपूर्ण योगदान दिएको बताए ।

मेयर शाहका अनुसार सडक पेटी अतिक्रमण नियन्त्रण, अनधिकृत संरचना हटाउने र यातायात व्यवस्थापनमा महानगर प्रहरी सक्रिय रूपमा खटिँदै आएको छ । उनले थपे, “नगर प्रहरीको प्रयासले काठमाडौंलाई अनुशासित र व्यवस्थित महानगर बनाउन मद्दत पुगेको छ ।”

कार्यक्रममा उपप्रमुख सुनिता डंगोलले नगर प्रहरीलाई व्यक्तिको नभई संस्थाको प्रतिनिधिको हैसियतमा काम गर्न आग्रह गरिन् ।

स्थापना दिवसको अवसरमा स्वयम्भूनाथ र वसन्तपुर दरबार क्षेत्रमा सरसफाइ अभियान सञ्चालन गरिएको थियो भने विभिन्न स्थानमा वृक्षारोपण पनि गरिएको थियो ।

वि.सं. २०५० भदौ १४ गते स्थापना भएको काठमाडौं महानगर प्रहरीमा हाल ३६२ जना कार्यरत छन् ।