देउवाको कड्को : “विदेशी नागरिकता लिएकालाई नेपाली नागरिकता दिन सकिन्न”
काठमाडौँ–नेपाली कांग्रेसका सभापति तथा पूर्वप्रधानमन्त्री शेरबहादुर देउवाले दोहोरो नागरिकता बहसमा कडा अभिव्यक्ति दिएका छन्। शनिबार ललितपुरमा आयोजित ‘सुगौली सन्धि र नेपालमा नागरिकता’ पुस्तक विमोचन कार्यक्रममा बोल्दै उनले विदेशी नागरिकता लिइसकेकाहरुलाई नेपाली नागरिकता दिन नसकिने स्पष्ट पारे।
ब्रिटिश गोरखा सैनिकहरूको सन्दर्भमा उठिरहेको नागरिकताको विषयमा बोल्दै देउवाले भने, “उनीहरूले नेपालको नागरिकता निरन्तरता चाहनु स्वाभाविक हो, तर एकपटक विदेशी नागरिकता लिएको व्यक्तिलाई पुनः नेपाली नागरिकता दिन सम्भव छैन।” उनले नेपालले दोहोरो नागरिकताको नीति नअपनाएको स्पष्ट गर्दै कानुनी रूपमा त्यस्तो व्यवस्था गर्न कठिन हुने बताए।
साथै, उनले गैरआवासीय नेपाली (एनआरएन) लाई जस्तै अरु कार्यका लागि सीमित अधिकारसहितको नागरिकता दिन सकिने धारणा पनि राखे। “नेपाल जस्तो देशमा दोहोरो नागरिकता दिने व्यवस्था गर्दा विविध चुनौतीहरू आउन सक्छन्,” देउवाले भने, “तर देश फर्किन चाहने सबैलाई हामी स्वागत गर्न तयार छौँ।”
उनले ब्रिटिश गोरखा सैनिकसम्बन्धी मुद्दा संसद्मा छलफलको चरणमा रहेको जानकारी दिँदै, छिट्टै निष्कर्ष आउने विश्वास पनि व्यक्त गरे।
पृष्ठभूमि:
हालैका वर्षहरूमा ब्रिटिश गोरखा सैनिकहरू लगायत विदेशमा दीर्घ समय बसेका नेपाली मूलका व्यक्तिहरूले नेपाली नागरिकताको निरन्तरता र अधिकारको माग गर्दै आएका छन्। दोहोरो नागरिकताको बहस संविधान संसोधनको एजेन्डासमेत बन्न थालेको बेला देउवाको यो अभिव्यक्तिले राजनीतिक र कानुनी वृत्तमा बहस चर्काउने देखिन्छ।
